SASOLBURG – Die Demokratiese Alliansie (DA) gaan aan die LUR vir Samewerkende Regering en Tradisionele Sake (COGTA), Saki Mokoena, skryf oor die vinnig versleggende toestand van Metsimaholo se elektriese infrastruktuur.

Substasies word gevandaliseer, kabeldiefstal neem toe, elektriese foute kom al hoe meer voor, en noodsaaklike onderhoud word eenvoudig nie gedoen nie.

Om die krisis te vererger, is die aangestelde paneel diensverskaffers sedert verlede jaar nie betaal nie. Dit is weens kooporders wat nie op die stelsel vasgelê word nie en fakture wat weggeraak het ’n administratiewe mislukking wat kritieke werk tot stilstand gebring het.

Tot ergernis het die munisipale elektrisiëns geen voertuie om hul pligte uit te voer nie. Die DA het hierdie kwessie die afgelope drie weke herhaaldelik geopper en formeel versoek dat die munisipaliteit LDV’s huur totdat die vloot herstel en weer operasioneel is.

In sy begrotingsrede het die Uitvoerende Burgemeester gespog dat Metsimaholo as een van slegs drie munisipaliteite landwyd gekies is om deel te vorm van die nasionale regering se “Adopt a Municipality”-program.

Oor die volgende 24 maande, vanaf Julie 2025, sou R1 miljard glo in infrastruktuur-opgraderings en herstelwerk belê word, maar niks is gedoen nie, en geen vorderingsverslag oor die befondsing en geïdentifiseerde projekte is nog voor die raad gelê nie.

Volgens Jacques Barnard sal die DA in Metsimaholo aanhou om onvermoeid te veg vir die betroubare dienslewering waarvoor inwoners betaal en wat hulle verdien.