MEYERTON – Al die veld was vrolik danksy die Vaaldriehoek se jong rose wat tydens die afgelope ASA Sub Jeug Atletiekkampioenskap in Potchefstroom op die Puk McArthur-stadion geblom het.
Die langasem, de Clercq-sussies Miane (1500m – o.13: 4:49.09) en Emma de Clercq (1200m – 3:49.44), het beide goue medaljes verower.
Die blitsige Dene Prinsloo (12.23s) het met ʼn breukdeel van sekonde uitgemis om die Suid-Afrikaanse 100m-rekord vir dogters o13 te verbeter. Die bestaande rekord is in 1997 opgestel. Sy het voorts ‘n bronsmedalje in die 200m ook gewen.
Volgens haar trotse pa, Snyman Prinsloo, wat self ʼn SA-naelloper op sy dag was, is hy bitter trots op haar. “Ons het glad nie hierdie tyd verwag nie,” sê hy glimlaggend.
In die 75m- en 200-hekkies vir dogters o13 het Sienna Roos ʼn silwermedalje (11:44s) en ʼn vierde plek (30.14s) teen strawwe mededinging behaal.
Die Adamsgeslag het ook hulle teenwoordigheid laat geld met RJ en SJ Muller wat onderskeidelik silwermedaljes in die hoogspring (1.52m – o11) en 800m (2:06.52 – o13) verdien het.
