Transvalia se Shanique trap tydtoetstitel los
'n Derde agtereenvolgende tydtoetsoorwinning vir Transvalia se Shanique.
VANDERBIJLPARK– Shanique Marx het by die Gauteng tydtoetskampioenskappe haar teenstanders behoorlik gewys dat sy ‘n fietsryer is om mee rekenskap te hou.
Die graad 11-leerder aan Hoërskool Transvalia, het ‘n eerste plek behaal, haar derde agtereenvolgende oorwinning in die provinsiale tydtoets.
Die volgende dag het sy ook ‘n indrukwekkende derde plek in die padwedren losgetrap.
Marx, wat vir haar nuwe span On Track by NXTG Racing ry, het haar talent by die gekombineerde pad- en tydtoetskampioenskappe in Mapleton, Boksburg, weer ten toon gestel.
Alles dui daarop dat sy op dreef is vir ‘n sterk seisoen.
On Track by NXTG Racing het onlangs sy span uitgebrei om vroulike fietsryers ook in te sluit, met die ondersteuning van borgskappe en vennote wat ‘n sleutelrol speel in die span se sukses.
Shanique is beslis ‘n opwindende jong fietsryer om dop te hou.
