VANDERBIJLPARK – Laerskool Eligwa het rede om trots te wees op een van hul graad 4-leerlinge, Kayvian Gorrie.

Hy het plaaslik al vele teenstanders in skaak oorwin en in die April-vakansie het hy aan die Skaak SA’s in Rustenburg deelgeneem.

Kayvian het ses van sy nege wedstryde gewen en uiteindelik 12de in die land geëindig. Hierdie was die tweede keer wat hy aan die SA’s deelgeneem het.

Hy het op vierjarige ouderdom begin skaak speel, maar het eers op agt aan toernooie begin deelneem. “Ek oefen elke dag,” vertel hy.

Die jongeling is mal oor sport en neem by die skool ook aan hokkie, krieket en atletiek deel. Hy het juis hierdie jaar by die D8 atletiekbyeenkoms drie goue medaljes gewen vir die 80m-naellope, 70m-hekkies en verspring.

Kayvian doen ook taekwondo en het al sy bruin belt verdien. Alhoewel hy goed vaar in sy akademie met LO en wiskunde as sy gunstelingvakke, sê hy prontuit dat hy baie meer van sport as skoolgaan hou.