Charl du Plessis gee lewe aan ERT se Steinway
Kombineer die mooie Steinway van die Etienne Rousseau Teater met die vaardige vingers van 'n meester pianis en jy het 'n kookwater vertoning.
SASOLBURG – Die gehoor is Sondag behoorlik bekoor deur Suid-Afrika se befaamde Steinwaypianis, Charl du Plessis.
Die vertoning het om 15:00 by die Etienne Rousseau Teater (ERT) plaasgevind. Hierdie vertoning was vir Du Plessis uiters spesiaal, aangesien dit die bekendstelling van sy tweede solo-album, My Favourite Things, gevier het.
Sy debuut-CD, Free Hand, is ook in die ERT opgeneem. Hy beskou dié teater as een van sy gunsteling teaters in die wêreld en hy het al wêreldwyd opgetree.
Soos hy self sê: “As ek hier is, skreeu my hart Vrystaat!” Hy is ‘n bekende gesig by die ERT en het oor die jare al menigmaal hier opgetree.
Nie net in solo vertonings nie, maar ook saam met sy Trio en vele kere saam met Nataniël. Sondag het Du Plessis van sy gunsteling klassieke werke gespeel. Die meeste met ‘n tipiese Charl du Plessis-kinkel.
Net hy kan dit foutloos regkry om My Way moeiteloos by Christian Sinding se Rustles of Spring in te werk. Om nie te praat van ABBA se Money, Money, Money in een van Beethoven se komposisies nie.
Hy het ook sy uitsonderlike talent gewys deur die gehoor te vra vir liedjies wat hulle wil hê hy moet speel.
So het hy die Bumble Boogie, The Tango uit Scent of a Woman, Autumn Leaves en Chopin meesterlik gekombineer na net ‘n paar sekondes van dink. Die mense het hul ingeleef in die vertoning en hy is met ‘n staande ovasie gegroet.
