MEYERTON – Dit is nie elke dag dat ’n mens ’n verstekeling in ’n motorenjin vind nie, maar vir twee susters van die dorp het ’n doodgewone Maandag in ’n groot verrassing ontaard toe ’n klein katjie na ’n moeisame tog van sowat 180 km uit ’n enjinruimte gered is.

Natasha Groenewald en haar suster, Marozane, wat ’n motorwerktuigkundige onderneming in die dorp besit, het Maandag ’n benoude gemiau vanuit ’n voertuig in hul werkswinkel gehoor.

By nadere ondersoek het hulle die klein katjie gevind – vuurwarm, maar ongedeerd.

“Ons vermoed die katjie het Maandag tydens ’n storm in Mooinooi (Rustenburg) skuiling in die enjin gesoek,” vertel Natasha.

Die voertuig het egter na Meyerton vertrek voordat die klein reisiger kon ontsnap.

Die katjie, wat intussen gepas as ‘Mooinooi’ gedoop is, het die lang pad oorleef en is volgens Natasha verbasend sosiaal.

“Sy is baie vriendelik en duidelik gewoond aan mense. Ons het reeds probeer om haar eienaars in Rustenburg op te spoor, maar tot dusver sonder sukses.”

Mooinooi het haar intussen tuisgemaak en die “baas” se kantoor by die werkswinkel as haar tydelike koninkryk opgeëis.

Hoewel sy daar veilig is, is die susters op soek na ’n meer permanente oplossing.

Met die langnaweek wat wink, is die hoop groot dat Mooinooi ’n liefdevolle tuiste sal vind waar sy met oorgenoeg aandag en “vryfies” bederf sal word.

Aangesien die kans skraal is dat haar oorspronklike eienaars opgespoor sal word, word daar nou na ’n nuwe eienaar gesoek.

Het jy inligting oor Mooinooi se eienaars, of wil jy haar dalk ’n nuwe kans op geluk gee?

Kontak Natasha by 062 641 7280.