‘n Swembad vir Coach Benny
Coach Benny was die held van vele jong swemmers wat hy oor 'n bestek van by die 20 jaar afgerig het. Nou is daar 'n swembad na hom vernoem.
VANDERBIJLPARK – Benny Janssen was vir jare een van die Vaaldriehoek se mees geliefde swemafrigters. Dit was meer as net ʼn werk vir hom, dit was waarvoor hy geleef het.
Hy het in 2021 tydens ʼn onderhoud met Vaalweekblad gesê: “Dit is my roeping. Ek doen alles uit geloof en met die genade van God.”
Elkeen van die Titans Swembklub se lede, van die beginners tot by die senior sterre, was vir hom en sy vrou Gerda, soos hul eie kinders.
Die skok was groot toe hy in 2023 oorlede is. Onlangs het Swim Excellence hul nuwe swembad aan Coach Benny toegewy.
Die Benny Janssen Swimming Pool het oral bordjies op met Benny se gesegdes. Die openingsgeleentheid is bygewoon deur sy vrou Gerda Janssen en van sy voormalige swemmers.
Alhoewel almal ʼn knop in die keel gehad het, was daar ook dankbaarheid en vreugde. Benny het diep spore getrap en dis gepas dat die swembad na hom vernoem is.
Nadat Gerda en die eienaar van Swim Excellence, Anita Lucas, die groot rooi strik geknip het, het hulle onseremonieel met klere en al in die swembad gespring.
