VANDERBIJLPARK – Die Vaaldriehoek het nog ʼn SA Kampioen opgelewer. Skopboks SA Kampioen o/27 kg om presies te wees. Adri Roux is ʼn graad 3 leerder aan die Laerskool D.F Malherbe.

Die naweek het sy aan die SA Nasionale Kickboxing kampioenskappe in Oudshoorn deelgeneem. Hier het sy gewys sy is gemaak van dinamiet en energie. Adri het brons in die afdeling Ligte Skoppe behaal en silwer in die afdeling Ligte Kontak.

In die Points afdeling het sy al haar teenstanders gekortwiek en goud behaal. Daarmee was sy ook gekroon as die SA kampioen.

“Ons het destyds besluit sy moet skopboks doen, omdat sy baie skaam was. Sy het altyd agter my bene weggekruip en natuurlik vir selfverdediging,” beduie haar ma, Brumilda Ferreira.

Nooit het hulle gedink die sport sou so ‘n groot verandering in Adri se lewe bring nie. Sy het ontpop in ‘n ekstrovert met hope selfvertroue en gesels ‘n hond uit ‘n bos uit.

In 2024 was sy die Afrika Kampioen in haar ouderdomsgroep en gewigsafdeling en het sy sewende op die wêreldranglys gestaan.

Van alles wat te doen het met die sport, hou sy die meeste daarvan om te skop.