SASOLBURG – Lede van die Sasolburg Openbare Orde-polisiëringseenheid (POP), Peloton 02, het die afgelope naweek naweek twee mans tussen die ouderdomme van 41 en 43 gearresteer vir die besit van ’n ongelisensieerde vuurwapen.

Op 25 April omstreeks 19:30 het lede gereageer op inligting wat ontvang is rakende twee verdagtes wat na bewering in besit van ’n ongelisensieerde vuurwapen was.

Die verdagtes is glo verbind aan ’n saak van intimidasie en die rig van ’n vuurwapen in Heilbron.

’n Beskrywing van die verdagtes, sowel as hul voertuig, is uitgestuur.

Die polisie het onmiddellik gereageer en na die R57 by die vierrigting-stop naby Amelia vertrek, waar die voertuig suksesvol voorgekeer is.

Tydens ’n deursoeking van die voertuig het die lede op ’n ongelisensieerde 9mm Star BM-pistool afgekom.

Albei verdagtes is onmiddellik op die toneel in hegtenis geneem.

Die verdagtes sal na verwagting binnekort in die Sasolburg-landdroshof verskyn.