SASOLBURG – Hy het die gehoor in die holte van sy hand gehou, vandat die eerste note opgeklink het tot sy laaste buiging op die verhoog. Ruhan du Toit se vertoning by die Etienne Rousseau Teater (ERT) Saterdagaand was monumentaal.

Monumentaal is een van Ruhan se vele treffers en mens kon ʼn speld hoor val toe hy dit gesing het. Nie dat die gehoor die heeltyd net geluister het nie. Ruhan weet hoe om die gehoor by sy vertoning te betrek.

Hy het mense aan die lag gehad met sy skerp sin vir humor en dit was ook nie lank nie toe sing almal heerlik saam aan sy FAK liedjie-medley. Van die ou-kraalliedjie tot by ver in die wêreld Kittie en daar kom die Alibama.

Natuurlik het sy weergawe van Sound of Silence weer vir hoendervleis oomblikke gesorg. Die gehoor het hoorbaar asem ingetrek met sy meesterlike vertolking van O Sole Mio.

Ruhan het die ERT se personeel geprys vir hul professionaliteit en gesê alles was in plek toe hy die middag opgedaag het vir die klanktoets.

Hy het die gehoor bedank dat hul sy vertoning bygewoon het en gesê hulle moet voortgaan om vertonings by te woon, sodat teaters soos die Etienne Rousseau kan oop bly.

Na die vertoning het Ruhan sy aanhangers in die voorportaal gaan groet en geduldig gestaan vir foto’s met ʼn vriendelike woord en glimlag vir al sy aanhangers.