‘n Formidabele optog van Smurfies tot Bosch Babies
Dit was 'n vrolike optog voordat daar in erns kaskarresies gehou is. Meer foto's eersdaags in die koerant.
VANDERBIJLPARK – Groot opwinding, baie lag en hope kreatiwiteit vat min of meer die optog vas voor die afskop van Laerskool D.F Malherbe se Kaskar 2026.
Die luggie het koud gebyt, maar glad nie die geesdrif gedemp nie. In en om die skoolterrein was daar nie parkeerplek vir ‘n muis nie. Binne het oumas, oupas, ouers, boeties en sussies die pawiljoen volgesit.
Stiptelik om 17:00 het die graad R-klassies die optog begin voor die hoofpawiljoen verby. Een vir een het die klasse verbygeloop.
Elkeen het ‘n tema uitgebeeld en vir elkeen is daar ‘n spesiale liedjie gespeel terwyl hul verbygeloop het. Daar was Smurfies, Minnie Muise, Shrek karakters, Boss Babies aka Bush Babies (hul klasonderwyseres is Susan Bosch), Leeus, 101 Dalmations en Slaapkousies.
