SASOLBURG – Sy is ʼn swart en wit hond vol lewe en baie geliefd by die Sasolburg Veearts. Was dit nie vir Dr. Letitia Swartz wat ʼn naweek spandeer het om haar langs die snelweg op pad Sasolburg toe te soek nie, was sy dalk nie vandag meer in die land van die lewendes nie.

Einde April is sy gekry en is inderhaas na die dierehospitaal geneem waar sy gebad is en die wond aan haar been versorg is.

Kort daarna het die goeie nuus gekom dat sy ʼn nuwe huis het. ʼn Vriendin van Letitia in Kimberley het gesê sy sal die hond aanneem.

Met die nuus, het Vaalweekblad haar dan ook Kimberley gedoop. Sy het vir drie weke by Sasolburg Veearts aangesterk.

In die tyd het sy in almal se harte gekruip. Cindy le Roux van Vanderbijlpark en eienaar van Nunu’s Nests – Bed pets & attire het selfs vir Kimberley ʼn paar jassies geskenk. Haar nuwe tuisdorp is ʼn koue plek!

22 Mei het haar nuwe mens-ma, Luana Venter vir Kimberley kom haal. Dit was ʼn hartseer-blye dag vir almal wat Kimberley versorg het.

Later die dag het Luana laat weet die rit huis toe was lank, maar Kimberley is klaar gemaklik en tuis in haar nuwe huis.  Intussen is sy ook herdoop en word nou Hoover genoem, want sy wil alles eet wat sy sien.

Dit gaan baie goed met Hoover Kimberley. Sy hou van die ander honde, maar nie van katte nie. en is baie bly vir haar nuwe speelgoed.