Bikers gee, VF Plus deel uit
Die 2026 Winter Drive was 'n sukses. Die dag word jaarliks gereël deur die Centurions MC, die Old School Bikers Social Riding Klub en die VF Plus.
VANDERBIJLPARK – In Sharky Town se parkeerterrein staan ‘n baie ou, groot boom. Sou die boom kon praat sal daar seker boeke geskryf kan word oor alles wat dit al gesien en beleef het.
Sondag het daar weer ‘n rare skare in sy koelte vergader. Bikers van verskeie motorfietsklubs in hul klub colours en VF Plus-lede in hul kenmerkende groen T-hemde het in die koelte gekuier.
Die reuk van pannekoek en gebraaide wors het in die lug gehang. Binne het die hoop kos, klere en komberse al hoe groter geword. Die donasieboks het die rondte gedoen en is mildelik ondersteun. Alles vir liefdadigheid.
Die middag het Colin Dee, Karlien Husselman, haar man Andy McGee en die Kannie Warries Dansorkes vir top vermaak gesorg.
Die klere en komberse is Maandag sorteer en Dinsdag het verskeie instansies en individue klere kom haal.
Dit wat oor gebly het, is aan drie van die Afrikaanse kerke geskenk vir hul klerebanke. Die kospakkies is Woensdag opgemaak.
Raadslid Cobus Cato het almal bedank wat bygedra het tot die sukses van hierdie jaar se winterinsamelingsveldtog.
