VEREENIGING – Hoërskool Overvaal se eerste rugbyspan het 23 Mei ’n harde maar verdienstelike 17–10-oorwinning oor Hoërskool Dr. Malan behaal in ’n kragmeting wat deel was van hul skuif na ’n hoër liga.

Dit was ’n besondere dag vir die Valies, wat vir die eerste keer teen Dr. Malan kragte gemeet het, ’n skool wat aansienlik groter is en sterk fisieke teenstand gebied het.

Volgens Overvaal het die dag nie sonder uitdagings begin nie, met probleme rondom noodhulpreëlings wat sekere logistiek vertraag het.

Die skool het egter verantwoordelikheid aanvaar en om verskoning gevra vir enige ongerief.

Ten spyte daarvan het die spelers op die veld hul fokus behou en met deursettingsvermoë en karakter die wedstryde aangepak.

Van die ses Overvaalspanne wat gespeel het, het drie as wenners van die veld gestap, met die eerste span se naelbytoorwinning as hoogtepunt van die dag.

Buiten die rugby het die halftyd-vertoning deur die cheerleaders groot indruk gemaak en vir ekstra atmosfeer langs die veld gesorg.