VANDERBIJLPARK – Die potte het vroeg-vroeg begin prut. Stalletjies is opgeslaan en op die grasperk het die springkastele verrys.

Die weer het saamgespeel en inwoners van regoor Herfsoord en Siësta het hul stoele gebring en heerlik saamgekuier by die oord se amptelike potjiekoskompetisie.

Victor Bravo het die musiek verskaf. Terwyl die spanne hul potte gebou het, kon die mense die ergste hongerpyne by die stalletjies vul. Daar was alles van samoosas tot pannekoek, beskuit en Wilde Weste koffie.

Onder die gazebo’s was daar ‘n verskeidenheid van potjies in wording van lamskenkel en bees tot by ‘n afval-pot. By die beespotjie van die De Jagers en Klungenbergs het hul in tipies Duitse-tradisie warm gluhwein voorgesit.

Terwyl die inwoners eetsaal toe is om te besluit watter potjie hulle gaan nuttig, het die beoordelaars geproe en kopgekrap om die wenners te bepaal.

Na vele beraadslaging het Die Pottenaars se Old Brown Sherry Lamskenkelpot met die louere weggestap.