VANDERBIJLPARK – “Music is what feelings sound like.” Dié lewensleuse spreek boekdele oor die passievolle lewe van Willem ‘Willie’ Bosschieter (57), bekende plaaslike sakeman en musikant wat op 7 Junie na ’n kort siekbed oorlede is.

Willie is in Vereeniging gebore, maar was die afgelope 30 jaar ’n huishoudelike naam in die streek as die eienaar van die musiekwinkel Musicland in Vanderbijlpark.

As jy ’n musikant in die Vaaldriehoek is, het jou pad heel moontlik een of ander tyd met syne gekruis.

Sy gesondheid het onlangs vinnig agteruitgegaan nadat hy met Fase 4-leukemie en sepsis gediagnoseer is.

“Baie mense het hom geken en ons fone gaan mal met boodskappe wat instroom. Ons wil net as gesin baie dankie sê vir almal se hulp, omgee en ondersteuning gedurende hierdie hartseer tyd,” sê sy dogter, Anuske Hugo.

Musicland word nou deur die derde generasie van die familie voortgesit. Willie laat sy vrou Annelie, dogter Anuske, seun Wian, kleindogter Wernuske, skoonseun Werner, sy ma, twee susters en ’n broer agter.

Sy roudiens vind Saterdag, 13 Junie, by die Vaalrivier-gemeente in Vanderbijlpark plaas.