SASOLBURG – Die winterkoue het buite gebyt, maar in die Etienne Rousseau Teater (ERT) was dit Saterdagaand vuurwarm. Die teater was uitverkoop.

Dit kan ook nie anders as Steve Hofmeyr sy draai in die Vaaldriehoek maak nie. Dit was sy Beautiful Noise – Tribute to Neil Diamond vertoning.

Hoeveel mense daar was omdat hulle Neil Diamond-aanhangers is, en hoeveel daar was net omdat dit Steve was wat opgetree het, sal niemand weet nie. Hoe dit ook al sy, die vertoning was eersteklas.

Nie net het Steve van Neil Diamond se grootste treffers gesing nie, hy het ook Diamond se lewensverhaal vertel.

Die gehoor het plek-plek lekker saamgesing en die tannies in die voorste ry het dit baie geniet toe Steve van die verhoog afgeklim het en elkeen met die hand gegroet het.

Hy het na die vertoning almal verras deur sy aanhangers in die voorportaal van die teater te ontmoet. Oud en jonk het saamgedrom om ‘n geselsie aan te knoop, sy handtekening te kry en ‘n foto te neem.

Die man het die geduld van Job, want hy het na elke storie geluister, saamgelag, gesels en amper ‘n uur en ‘n half in die voorportaal spandeer totdat die laaste aanhangers by die deur uit is. Hopelik kom kuier hy gou weer by die ERT.