Uit die as opgestaan – gewond maar onoorwonne
Konsentrasiekampdag word jaarliks landswyd op 16 Junie gevier en verwys na die dag wat die verskroeideaardebeleid geproklameer is in 1900.
VEREENIGING – 16 Junie 1900. Te midde van die Anglo-Boereoorlog het Lord Frederick Roberts die verskroeide aardebeleid aangekondig.
Plase is afgebrand, vrouens en kinders het in konsentrasiekampe beland. Duisende vroue en kinders het in haglike omstandighede gesterf.
120 jaar later word die dag as Konsentrasiekampdag herdenk en word die lewens van almal wat in die Anglo-Boereoorlog gesterf het steeds onthou.
Hierdie jaar is die dag weer by die Konsentrasiekamp begraafplaas herdenk. Pastoor Kriel het ʼn boodskap van hoop, vertroue en geloof oorgedra, daar is ʼn skyngeveg gehou, die Sasolburg Voortrekkers het gesing en de Vryheidsmonument Kommando het die vlagpersentasie gedoen.
Blomme is by die herdenkingsmuur neergelê wat die name en ouderdomme van die vroue en kinders bevat wat in die Vereenigingkonsentrasiekamp gesterf het.
Alhoewel die amptelike verrigtinge somber was, het die dag ook bewys dat Afrikaners altyd weer opstaan en voortgaan.
Daar is heerlik gekuier oor boeretroos en tusgebak en natuurlik is daar gebraai.
Die Vaalrivier Volkspele Laer en die Albatros Laer het kleur en vrolikheid gebring met hul spele van toeka tot nou. Die liedjies waarop hul passies uitgevoer het, sluit in Aanstap rooies, Daar kom Tant Alie en die Oukraalliedjie.
