AfriForum het die Emfuleni Plaaslike Munisipaliteit drie dae gegee om ’n volledige noodaksieplan voor te lê om die voortdurende rioolbesoedeling by pompstasies 8 en 10 in Drie Riviere, Vereeniging, onmiddellik te stop.

Die versoek volg nadat dit aan die lig gekom het dat duisende liters rou riool daagliks weens stukkende pompe in die Vaalrivier invloei.

Hierdie jongste geval van rioolbesoedeling kom te midde van verskeie ander regsaksies teen die Emfuleni-munisipaliteit oor rioolbesoedeling elders in dié munisipaliteit.

Drie van hierdie sake is deur AfriForum geïnisieer en sal weer op 1 September voor die hof dien.

Jaco Grobbelaar, AfriForum se hoof vir die sentraalstreek, skryf die situasie toe aan volgehoue onbevoegdheid en die afwesigheid van aanspreeklikheid onder die optredende munisipale bestuurder, April Ntuli.

Grobbelaar benadruk dat die rioolstorting ’n nasionale omgewingskrisis is wat ’n strategiese waterbron vernietig en miljoene mense aan gesondheidsrisiko’s blootstel.

AfriForum kritiseer ook die gebruik van belastinggeld om die munisipaliteit se regskoste te dek en pleit daarvoor dat senior amptenare persoonlik aanspreeklik gehou word vir die administratiewe versuim.

Die organisasie doen ten slotte ’n beroep op die regering om alternatiewe bestuursmodelle te oorweeg waar bevoegde gemeenskapsinstellings die infrastruktuur kan bestuur.