VEREENIGING – Die polisie moes ingryp nadat geweld tydens ‘n betoging in Vereeniging uitgebreek het waar ‘n groep inwoners teen buitelandse sake-eienaars opgeruk het.

Volgens inligting het die betogers geëis dat buitelanders die land moet verlaat. Die situasie het egter vinnig versleg toe botsings tussen die twee groepe ontstaan het.

Verskeie paaie is tydelik versper met brandende buitebande en klippe, wat verkeer in die gebied ontwrig het. Tydens die onrus is vensters van voertuie en winkels wat aan buitelandse sake-eienaars behoort, ook beskadig.

Ooggetuies het berig dat lede van die twee groepe mekaar met klippe bestook het voordat die polisie ingegryp het om die situasie onder beheer te bring.

Die omvang van beserings of moontlike inhegtenisnemings was teen druktyd nog onbekend. Die polisie monitor die situasie en ondersoek die voorval.