Kollegepark se Wildsfees was weer ʼn treffer
Die Parkies weet hoe om lekker fees te vier en hul jaarlikse Wildsfees is altyd een vir die boeke.
VANDERBIJLPARK – Saterdag was daar ʼn groot bedrywigheid by Laerskool Kollegepark. Van vroeg is daar gewoel om alles reg te kry vir hul Wildsfees 2026.
Hierdie jaar kon mense ʼn verskeidenheid van vleis proe by die eksotiese wildtafel, van ystervark, tot by krokodil, meerkat en jakkals.
Met die son wat water trek, is die kampvuur aangesteek, terwyl ʼn orkes die voete laat jeuk het. Die lug is gevul met die geur van braaivleis en ander moderne wildgeregte. Almal het behoorlik fees gevier en lekker saamgekuier.
Die Wildsfees is ’n unieke gemeenskapsviering wat kultuur, kos en kuier saambring. Dit bied ’n warm, gesellige atmosfeer met groot vure, musiek, markstalletjies en ’n sterk gemeenskapsgees.
Laerskool Kollegepark bedank elke ondersteuner wat hierdie aand so ongelooflik gemaak het. Julle het weer eens gewys wat Kollegepark-gees beteken.
