VANDERBIJLPARK – Die voormalige vlootbestuurder van die Emfuleni Plaaslike Munisipaliteit, Lerato Mpholo (42), is Woensdag in die Vanderbijlpark-landdroshof borgtog van R25 000 toegestaan.

Mpholo staan tereg op aanklagte van onder meer bedrog, korrupsie en diefstal wat verband hou met ‘n beweerde onreëlmatige tender vir munisipale voertuie.

Volgens die ondersoek is sowat R16 miljoen aan ‘n diensverskaffer betaal vir die lewering van 18 voertuie, maar net sewe is na bewering afgelewer.

As deel van sy borgtogvoorwaardes mag Mpholo nie oor ‘n paspoort beskik of Gauteng sonder toestemming verlaat nie. Hy mag ook nie buite Suid-Afrika reis nie.

Die saak is tot 29 September uitgestel terwyl die ondersoek voortduur.