VANDERBIJLPARK – Die Laerskool D.F Malherbe se hokkiespanne het’n goeie Rhino-week agter die rug.

Die o.13A-seuns en die o.11-A dogters het goud verower. Die o.13 A-dogters, die o.13B-seuns, die o.11-B seuns en die o.11B-dogters het tweede plekke behaal. Die o.11A-seuns het derde in hul afdeling geëindig.

Vyf van die skool se hokkiespelers het uitsonderlike prestasies gelewer.

Owen Webb is 13 jaar oud en is tans in Graad 7. Hy is as speler van die toernooi vir die o.13-seuns aangewys.

Owen het drie jaar terug begin hokkie speel en wil eendag vir Nederland speel. Hy neem aan verskeie sportsoorte deel, maar sê hy gaan in die hoërskool net op hokkie konsentreer.

Nina Pretorius is die top doelskieter van die toernooi. Sy is tans in Graad 5 en speel vir die o.11’s. Nina het in Graad 1 met mini-hokkie begin.

Sy speel ook netbal en doen Judo. Nina geniet haar hokkie, maar sy wil eendag ‘n hartchirurg word om mense te kan help.

Zoë Kruger is in Graad 6 en is as die o.13-doelwagter van die toernooi gekroon. Sy speel ook netbal en gholf en het op ‘n stadium aan perdespring deelgeneem.

Klara Jonker se harde werk is beloon toe sy as o.13-speler van die toernooi aangewys is. Sy is baie sportief en neem deel aan netbal, hekkies en landloop. Alhoewel sy dit geniet om hokkie te speel, is haar gunsteling sport netbal.

Luan Louw is die o.11 doelwagter van die toernooi. Hy speel nou een jaar hokkie by die skool en dit was sy eerste Rhino-week.

Luan is baie goed in sport en speel ook rugby en krieket en neem aan gewigstoot deel. Sy gunsteling sport bly egter rugby waar hy stut of slot speel. Natuurlik ondersteun hy die Springbokke asook die Blou Bulle.