VANDERBIJLPARK – Emily Rencken en Mika du Preez van Die Voortrekkers se Orion Kommando het die hoogste toekenning vir Voortrekkers in Graad 12 ontvang. Hulle is nou Presidentverkenners.

Om hierdie toekenning te kan verwerf vereis baie harde werk, dissipline en toewyding. Kandidate moet aan streng vereistes voldoen.

Aan die begin van die jaar het hulle die teoretiese evaluering, bekend as Hoofleierswag, voltooi. Daarna is hulle uitgenooi na ‘n landswye nasionale afrondingskamp voordat hulle die Presidentsverkennertoekenning verwerf het.

Dis ’n simbool van uitnemendheid in leierskap, diensbaarheid, kultuur, en persoonlike ontwikkeling en is sedert 1967 ’n gesogte prestasie.

Hierdie toekenning span die kroon op hulle betrokkenheid as jeuglede van Die Voortrekkers.