Wie gaan Lady Rosa se redder wees?
Lady Rosa is tans in die veilige sorg van Purrpaws for Life Rescue Centre, maar sy benodig iemand wat haar vir altyd sal liefhê.
SASOLBURG – Die een oomblik het sy ‘n veilige huis en ‘n bekende gesin gehad, en die volgende oomblik is alles wat vir haar bekend was, van haar weggeneem.
Lady Rosa, ‘n skattige Jack Russell- en Pekingese-kruising van net oor ‘n jaar oud, is onlangs deur haar eienaars aan Purrpaws for Life Rescue Centre afgestaan nadat hulle getrek het.
“Die lewe bring dikwels onverwagse wendings vir mense, maar dit is ongelukkig die diere wat die swaarste daaronder ly,” sê Lindie Naudé van Purrpaws.
“Klein Lady Rosa se hele wêreld is hand-om-keer omgedop, en sy is verward.”
Nietemin is dié klein wolhaar nog vol liefde. Al wat sy nou benodig, is ‘n veilige, liefdevolle huis om haar gebroke hartjie te genees en haar ‘n tweede kans op geluk te gee.
Mense wat dink hulle kan Lady Rosa se redder wees, kan Purrpaws For Life Rescue Centre kontak by 083 650 9558.
Standaard aannemingsreëls en ‘n huisbesoek geld.
