Transvalia gholfers gekies vir SA-span
Dit het baie harde werk en oefening geverg en die laaste toernooi in Nelspruit was in regte eende weer, maar die twee het dit gedoen!
VANDERBIJLPARK – Hoërskool Transvalia het ʼn skitterende gholfseisoen in 2026 gehad. Nie net het die Valia-span hul 12de Vaaldriehoek-liga-oorwinning behaal nie, vier van hul spelers het die Vaaldriehoek Hoërskole span gehaal wat by die SA Hoërskole deelgeneem het.
Hulle het ook derde gekom in die uiters kompeterende Noordvaal finaal waar Janko Vrey (kaptein) as die nommer 1-speler gekroon is.
Die kersie op die koek is dat Janko en NF van Tonder na afloop van die SA Hoërskole-toernooi in ʼn uitmergelende driedagtoernooi in eende weer, gekies is vir die SA Hoërskole A-span. Die span gaan kragte meet teen Zimbabwe.
Transvalia het op hul Facebookblad die volgende geplaas: “Ons by VALIA is ongelooflik trots op julle en wens julle alle sterkte toe vir die uitdaging teen Zimbabwe se beste spelers.”
