Soektog na leeu in Redan
Inwoners is gewaarsku nadat ’n leeu glo vroeg vanoggend in die gebied opgemerk is.
OPDATERING: 12:30, 2026/10/14
Polisie waarsku teen vals gerugte oor leeu in Redan
REDAN – Die polisie het inwoners gewaarsku om nie onbevestigde inligting oor die leeu waarna daar sedert vroegoggend (14 Oktober) in die Redan-omgewing gesoek word, te versprei nie.
Dit volg nadat ’n boodskap die ronde begin doen het dat die leeu reeds opgespoor is en dat daar beplan word om die dier te verdoof en na Bloufontein Wildlife Park te vervoer totdat die eienaar opgespoor kan word.
AO Pieterse, wat by die soektog betrokke is, het in ’n boodskap bevestig dat die soektog steeds voortduur.
“Please don’t post stuff on the group if you are not sure about it. Just confirm what you post,” het Pieterse gewaarsku.
Volgens hom bevind die leeu hom vermoedelik in die omgewing van McKay Agricultural Holdings, aan die Redan-kant.
Die digte bosse en plantegroei bemoeilik die soektog.
“We are struggling with all the bushes and stuff so it’s taking time,” het hy gesê.
Pieterse het inwoners versoek om die polisie onmiddellik te kontak indien hulle die leeu gewaar.
’n Bron wat by die soektog betrokke is, het vroeër aan Vaalweekblad gesê dat die soekspan die dier gewaar het, maar dat dit nog nie verdoof is nie.
Die leeu is dus steeds op vrye voet en die soektog duur voort.
OPDATERING: 10:40, 2026/10/14
Bloufontein ontken dat leeu van wildpark afkomstig is
REDAN – Bloufontein Wildlife Park het hom amptelik gedistansieer van die leeu waarna daar sedert vroeg vanoggend (14 Oktober) in die Redan-omgewing gesoek word.
Die wildpark het in ’n verklaring vanoggend bevestig dat al sy diere nagegaan is en dat geen leeus of ander diere vermis word nie.
Volgens die bestuur behoort die leeu wat na bewering in die omgewing opgemerk is, nie aan Bloufontein Wildlife Park nie.
Die verklaring volg nadat ’n veiligheidswag, Ithumeleng Mobadi, die dier omstreeks 03:50 tydens sy patrollie opgemerk en afgeneem het.
Hoewel Bloufontein in sy verklaring na die dier as ’n leeumannetjie verwys, bestaan daar steeds onsekerheid oor die geslag.
Mobadi vermoed dat dit ’n leeuwyfie is omdat hy nie ’n groot maanhaar opgemerk het nie. Verteenwoordigers wat by die soektog betrokke is, het egter aan Vaalweekblad gesê dat die geslag nog nie met sekerheid vasgestel kan word nie.
Die soektog het intussen na McKay Agricultural Holdings, aan die oorkant van Redan, verskuif.
Kobus Jordaan, wat by die soektog betrokke is, het omstreeks 10:23 bevestig dat die soekspan weer op die dier se spoor is, maar steeds sukkel om die leeu self op te spoor.
Waar die dier vandaan kom, is nog onbekend.
OPDATERING: 10:30, 2026/10/14
Soekspan op leeu se spoor by McKay Estates-landbouhoewes
REDAN – Die soekspan wat sedert vroeg vanoggend (14 Oktober) na ’n leeu in die Redan-omgewing soek, is glo weer op die dier se spoor.
Kobus Jordaan, wat by die soektog betrokke is, het omstreeks 10:23 aan Vaalweekblad bevestig dat die soektog nou in McKay Estates-landbouhoewes, naby Redan, voortduur.
“Ons is nou weer op sy spoor in McKay,” het Jordaan gesê.
Hy het kort daarna bevestig dat die soekspan daarin geslaag het om die dier se spoor te volg, maar steeds sukkel om die leeu self op te spoor.
Die dier is dus nog nie gevind of gevang nie.
Die soektog duur voort.
OPDATERING: 10:10, 2026/10/14
Hommeltuig ingespan in soektog na leeu
REDAN – ’n Hommeltuig wat glo met hittebeeldtegnologie toegerus is, word ingespan in die soektog na ’n leeu wat vroeg vanoggend (14 Oktober) in Redan opgemerk is.
Die tegnologie stel die operateur in staat om temperatuurverskille waar te neem, wat kan help om diere in die donker of tussen digte plantegroei op te spoor.
Kobus Jordaan, ’n inwoner wat by die soektog betrokke is, het vroeër aan Vaalweekblad bevestig dat ’n hommeltuig gebruik word om na die dier te soek.
Die polisie se honde-eenheid, plaaslike inwoners en verteenwoordigers van Bloufontein Wildlife Park is ook by die soektog betrokke.
Die dier se huidige ligging is nog onbekend. Daar bestaan ook onsekerheid oor of dit ’n leeumannetjie of leeuwyfie is.
OPDATERING: 09:50, 2026/10/14
Soektog na leeu in Redan duur voort naby skool
REDAN – Die soektog na ’n leeu in Redan duur voort in ’n gebied naby Springfield Junior Secondary School.
Daar is ook ’n onwettige stortingsterrein in die omgewing waar herwinnaars tussen die afval na herwinbare materiaal soek. Dit wil voorkom of die herwinnaars reeds bewus is van die berigte oor die leeu wat moontlik in die omgewing rondbeweeg.
Die polisie se honde-eenheid is op die toneel en word deur inwoners van Redan en verteenwoordigers van Bloufontein Wildlife Park bygestaan.
Volgens inligting wat Vaalweekblad ontvang het, is natuurbewaringsbeamptes ook na bewering onderweg om met die soektog te help.
Dit is nog nie bevestig of die dier ’n leeumannetjie of leeuwyfie is nie. Die dier se huidige ligging is ook onbekend.
OPDATERING: 09:30, 2026/10/14
Onsekerheid oor geslag van leeu in Redan
REDAN – Daar bestaan steeds onsekerheid oor die geslag van die leeu waarna daar sedert vroeg vanoggend (14 Oktober) in Redan gesoek word.
Ithumeleng Mobadi, die veiligheidswag wat die dier na bewering omstreeks 03:50 opgemerk en afgeneem het, vermoed dat dit ’n leeuwyfie is.
“The way I saw it, the males have big hair. That one didn’t have big hair. I think it is a female,” het Mobadi aan Vaalweekblad gesê.
Bloufontein Wildlife Park het egter vroeër vandag in ’n amptelike verklaring na die dier as ’n leeumannetjie verwys.
Die park het terselfdertyd bevestig dat al sy diere veilig is en dat geen leeus uit sy aanhouding ontsnap het nie.
‘n Verteenwoordigers wat by die soektog betrokke is, het intussen aan Vaalweekblad gesê dat niemand in hierdie stadium met sekerheid kan sê of dit ’n leeumannetjie of leeuwyfie is nie.
Die geslag van die dier moet dus nog bevestig word.
OPDATERING 09:00, 2026/10/14:
Veiligheidswag vertel oor ervaring met Leeu
REDAN – Die veiligheidswag wat die dier na bewering eerste opgemerk het, Ithumeleng Mobadi, het aan Vaalweekblad vertel hoe hy tydens sy patrollie op die dier afgekom het.
Volgens Mobadi was hy vanaf ’n boorgat op pad toe hy naby ’n paal aan die oostekant van Redan vreemde geluide gehoor het.
Hy het stilgestaan en sy selfoon se flitslig aangeskakel om ondersoek in te stel.
“Ek het aanvanklik gedink dit is dalk ’n kat of iets,” het hy vertel.
Toe hy sy lig op die dier skyn, het hy egter besef dit is baie groter as wat hy verwag het.
Mobadi het sy flitslig afgeskakel en daarin geslaag om ’n foto van die dier te neem.
Volgens hom het die dier daarna in ’n suidelike rigting weggehardloop. Hy het self ook op die vlug geslaan.
Op die vraag of hy bang was, het hy sonder huiwering geantwoord: “I was so scared.”
Soektog na leeu by Redan
REDAN – ’n Soektog is vanoggend, 14 Oktober, in Redan aan die gang nadat ’n leeu glo omstreeks 04:00 opgemerk is.
Kobus Jordaan, ‘n inwoner wat op die toneel is, het bevestig dat die polisie teenwoordig is en ’n hommeltuig met hittebeeldtegnologie gebruik word om na die dier te soek.
“Ons is hier. Die polisie is hier by ons,” sê Jordaan. “Ons kyk nou maar ons sien nie enige iets op die oomblik.”
Volgens hom duur die soektog reeds sedert 04:00.
In WhatsApp-waarskuwings aan huurders word beweer dat ’n veiligheidswag die dier omstreeks 03:50 gesien het. Die wag kon daarin slaag om ‘n foto van die dier te neem. Huurders is versoek om binnenshuis te bly en hul troeteldiere binne te hou.
Bloufontein Wildlife Park het intussen in ’n verklaring gesê die leeu waarvan berig word, behoort nie aan die park nie. Volgens die bestuur is al sy diere nagegaan en word geen leeus of ander diere vermis nie.
Waar die dier vandaan kom en wat die huidige ligging is is nog nie bevestig nie.
Die voorval herinner aan die soektog na Sheba, ’n tierwyfie wat in Januarie 2023 uit haar kamp op Rassie Erasmus se kleinhoewe in die Walkerville-gebied ontsnap het. Sy het ’n man beseer en diere aangeval voordat sy op 18 Januarie doodgeskiet is nadat daar besluit is dat sy nie veilig gevang kon word nie.
