Betondwarslêers rondom Veltmanpark gelê om toegang vir voertuie te verhoed
Silvija Breytenbach het gesê dat, onder andere, drank- en dwelmgebruik in Veltmanpark nie 'n ongewone gesig is nie.
ERMELO – Daar is al etlike kere in Hoëvelder oor Veltmanpark, wat in 2021 opgeknap en weer aan die gemeenskap oorhandig is, berig, maar soms vir slegte redes ook.
In 2021 is nuwe swaaie, ‘n rondomtalie en ‘n wipplank deur Ben Greyling en sy span, Derrick Kellerman en Emlyn Hughes, aangebring, terwyl Neil Mattieson die sny van die gras behartig het. Later is daar ook ‘n klimraam vir die kinders opgerig.
LEES OOK: Wegneemeteboksies en drankbottels oral te siene by Ermelo se kinderparkies
Die inwoners sal onthou hoe die jongspan tydens die Paaseierjag baljaar het en hoe Kersfeesvieringe ook hier plaasgevind het.
Maar nou lyk die situasie heel anders.
Die afgelope twee jaar was dit opvallend hoe drasties die terrein en toerusting agteruitgegaan het.
LEES OOK: Boards at Veltman Park in Ermelo fall over
Saans word voertuie met harde musiek daar geparkeer, terwyl kattebakke vol drank ‘n algemene tendens geword het.
Ná hierdie kuiersessies lê gebreekte glasbottels, wegneemetehouers en ander rommel wyd gesaai.
Boonop word die klimrame en swaaie, wat nie vir hulle bedoel is nie, gereeld deur die volwassenes en groter kinders misbruik.
LEES OOK: Inwoners maak beswaar teen jong motorfietsryers by Veltmanpark
Silvija Breytenbach, wat oorspronklik by die opknapping van die park betrokke was, het haar misnoeë oor die situasie uitgespreek.
Sy het gesê dat drank- en dwelmgebruik hier nie ‘n ongewone gesig is nie, en dat daar al by verskeie geleenthede gebruikte naalde aangetref is.
“Die paaltjies wat opgerig is om toegang vir voertuie tot die park te voorkom is uitgehaal, en deesdae is dit algemeen dat mense met hul voertuie naby die toerusting parkeer en piekniek hou,” het sy gesê.
In ‘n poging om die probleem aan te spreek, het Breytenbach genoem dat betondwarslêers, soos dié wat op die spoorweë gebruik word, rondom die park neergelê is in die hoop om die voertuie uit die park te hou.
‘n Groot bohaai het oor Hoëvelder se beriggewing van jong motorfietsryers ontstaan, wat ten spyte van ‘n bord wat aandui dat motorfietse nie in die park mag ry nie, die reëls verontagsaam het.
Die berig het reaksies van verskeie inwoners uitgelok.
Sommige het gesê mense moet ophou kla oor alles en die jong motorfietsryers uitlos. Ander het gemeen dat die gedrag van dié wat in die park drink en urineer, meer aandag verdien as die kinders wat reëls en regulasies oortree.
Ongelukkig blyk dit dat wanneer een stel reëls nie gehandhaaf word nie, die res van die gemeenskap voel dat hulle ook nie enige reëls hoef te gehoorsaam nie.
Lees die volledige berig in Hoëvelder.
