Junior rolbalspelers behaal uitstekende prestasie in Gauteng

’n Span van vier Junior Mpumalanga-rolbalspelers het onlangs aan die Gauteng Challenge deelgeneem en ’n indrukwekkende tweede plek behaal.

Die span bestaan uit drie spelers van Ermelo, AJ Maherry, Janco Minnaar en Pieter Swanepoel, asook Aiden Nel van Secunda.

Hulle het teen verskeie sterk spanne te staan gekom en na twee dae se strawwe wedstryde het hulle gewys dat hulle ’n span is waarmee daar rekening gehou moet word.

“Ons is uiters trots op hierdie jong mans en sien uit na hul toekomstige prestasies,” het Gerda Swanepoel, die president van die Ermelo Rolbalklub, gesê.