Ses Ermelo-stoeiers help Pumas na Noordvaal top drie
Die Pumas het op die matte geswoeg en met net een punt agter die naaswenners geëindig om die derde plek te verower.
Ses stoeiers van die Ermelo Stoeiklub het hul deel bygedra om te verseker dat Mpumalanga Stoei Vereniging ’n derde plek tydens die Noordvaal Presidente Toernooi behaal het.
Die toernooi het Saterdag by die Noord-Gauteng Saal in Menlopark plaasgevind.
Vir dié kompetisie is die beste stoeiers in elke gewigsklas uit hul onderskeie provinsies gekies om teen vyf ander provinsies mee te ding.
Die stoeiers ding nie volgens hul ouderdom mee nie, maar volgens gewig in die onderskeie gewigsklasse.
Elke stoeier se prestasie tel punte vir hul span, en aan die einde ontvang die top drie provinsiale spanne medaljes of sertifikate.
Luke Anderson, JC de Villiers, MJ de Villiers, Dawid de Wet, Kyle Breytenbach en WP Human, asook die afrigter, Reghardt van Niekerk en beamptes, Yvonne Olivier en Silvija Breytenbach, is gekies om die Mpumalanga Stoei Vereniging te verteenwoordig.
Die Pumas het op die matte geswoeg en met net een punt agter die naaswenners geëindig om die derde plek te verower.
Die Bulls het eerste met 60 punte geëindig, gevolg deur die Valke met 39 en die Pumas het met 38 geëindig.
