Barberton se eerstes wen teen Rooikatte

Afgesien van ‘n paar ondersteuners, wie se teenwoordigheid tydens tuisrugby al ‘n gegewe is, was die opkoms by Saterdag se wedstryde op Coronation Park maar power.

Barberton se tweede span het net voor drie teen Ohrigstad te staan gekom. Alhoewel hulle baie hard gespeel het, kon hulle dit maar net nie reg kry om punte aan te teken nie, en moes die knie buig nadat Ohrigstad 31 ingepalm het.
Voorspeler van die wedstryd was Ruben Janse van Vuuren en die agterspeler Croc Shunilu.

Teen die tyd dat Barberton se eerste span saam met die Rooikatte van Lydenburg op die veld gedraf het, was die handjievol Barberton-ondersteuners al reg vir aksie. Barberton het nie teleurgestel nie en drieë is deur Quintin Fourie (2), Jaundre Laubscher (2) en een deur Johan Schoeman aangeteken. Alhoewel die Rooikatte gedugte opponente was, moes hulle maar naels terugtrek toe die eindtelling op 33-21 in Barberton se guns te staan gekom het.

Hans Meyer is as voorspeler van die wedstryd aangewys en Quintin Kruger was die beste agterspeler.
Op Saterdag 7 Mei word daar weer tuis teen Komatipoort gespeel. Die tweede span skop om 14:30 af en die eerstes om 16:00. Die gemeenskap word uitgenooi om Barberton te kom ondersteun.