Tref-en-trapongeluk knip jong leerling se lewe kort
Die tweede kwartaal het op 'n hartseer noot afgesluit nadat een van Laerskool Burgersfort se leerlinge tydens 'n tref-en-trapongeluk gesterf het
BURGERSFORT – Die personeel van Laerskool Burgersfort het die tweede kwartaal op ‘n hartseer noot afgesluit nadat een van hul leerlinge tydens ‘n tref-en-trapongeluk gesterf het.
Dintle Selahle het op 25 Junie met ‘n taxi na haar huis in Praktiseer gery. Naby haar ouerhuis het sy uitgeklim toe ‘n voertuig haar getref het. Sy is per ambulans na Dilokong Hospitaal geneem, maar weens die erns van haar beserings het sy kort daarna gesterf.
“Sy was een van ons toppresteerders in sport en akademie. Sy het ‘n vrolike en vriendelike persoonlikheid gehad. Ek gaan veral daai laggie van haar mis,” vertel me. Lorraine Farrel, ontvangsdame by die skool.
Dintle was in me. Henda Strydom se gr. 1-Engelse registerklas. “Sy was ‘n goeie netbalspeler, ek kan selfs sê dat haar toekoms oop was om daarin te presteer,” vertel Strydom.
Mnr. Coert Erasmus, hoof vertel dat hulle Dintle baie gaan mis en dat sy altyd deel van die laerskool sal bly. Hulle innige simpatie gaan aan haar familie en ouers.
Dintle laat haar ouers, Michael en Matsemela asook twee susters, Kgaogelo en Reshogofaditswe agter.
