Barbertonners is diep geskok oor ‘n voorval wat Saterdag in die vroeë oggendure by die kroeg, 18 On Sheba, plaasgevind het.
Louis Stephanus Neethling (54), ‘n skofbaas by Sheba-myn, het gesterf nadat hy drie maal met ‘n skerp voorwerp gesteek is.
Anthony Cornelius (56), alom bekend as Ghoena, ‘n skofbaas by Fairview-myn, is na die voorval gearresteer.
Volgens wat Barberton Times kon vasstel, was Neethling klaarblyklik betrokke in ‘n liefdesdriehoek wat Cornelius se vrou, Charmian ingesluit het.
Volgens sers. Tutu Nkosi van Barberton SAPD, het ‘n struweling tussen die twee mans ontstaan wat in die kombuis van die kroeg geëindig en klaarblyklik Neethling se dood tot gevolg gehad het. Die wapen is nog nie gevind nie.
Cornelius het Maandag in die landdroshof op aanklag van manslag verskyn.
Hy is borgtog van R2 000 toegestaan.
Die saak is tot 31 Mei uitgestel en word deur Barberton SAPD ondersoek.
