Geloftefees was jolig gevier
Vanjaar was daar weer baie geloof, hoop en feesvieringe by die Geloftefees wat die afgelope naweek op verskeie plekke gehou is.
‘n Groot trekpleister was die saamtrek by die Watervalsgeloftefees-saal in die hartjie van die Watervalsriviervallei. Kampeerders het hulle reeds verlede Vrydag by die terrein begin tuismaak en laer opgeslaan.
Van die afskop van die fees was daar ‘n gesellige atmosfeer en ‘n gevoel van samehorigheid onder die mense. Later die aand het almal om die kampvuur vergader en verskeie liedjies gesing. Dit het sommige van die ouer feesgangers nostalgies laat nadink oor hulle kindertyd en die herkoms van die liedere, terwyl die jongspan kon kennis maak met volksliedjies.
Saterdag was ‘n bedrywige dag. Van vroegoggend af was daar onder andere boeresport, soos toutrek, toffie-appel-eet en vele ander pret aktiwiteite.
Later die dag was dit tyd vir die langverwagte potjiekoskompetisie. Kampeerders is uitgedaag om die beste potjie van die dag voor te sit. Hoewel dit nie ‘n amptelike kompetisie was nie, was die deelnemers duidelik opgewonde en geesdriftig.
Feesgangers kon kies en keur van watter pot hulle wou eet, en niemand was teleurgestel nie, want dié mense ken mos van kos maak.
Die volgende oggend voor sonsopkoms is ‘n saluut afgevuur. ‘n Geskiedkundige rolprent is vertoon waarna die algemene jaarvergadering gehou is. Daardie aand is die storie agter hierdie fees aan jonk en oud oorvertel. Die gebeure het die volgende dag afgesluit met ‘n ontbyt by die waterval, waarna die laer afgebreek is.
Verskeie kerke in die omliggende omgewing het die naweek ook dienste gehou ter herdenking van die Slag van Bloedrivier.
