Volgens hom is dit gewis die grootste swartmamba wat hy al in Lydenburg gevang het. Die 2,75 m lange kalant het Bothma verseker bietjie meer as gewoonlik laat konsentreer toe hy dit met ’n flitslig in die slangkas wou inlei.

Op Maandag 14 Maart het hy ’n oproep van die eienaar van ’n huis in die. Sterkspruit Estates-kompleks ontvang.

“Die huiseienaar het al ’n geruime tyd die slang in die omgewing opgemerk, maar dit kon nie met sukses aangekeer word nie. Daardie aand het die eienaar buitentoe gestap toe hy die slang in sy tuin hoor blaas het. Anton Edwards se hulp is ook ingeroep; hy verwyder gewoonlik slange in die kompleks. Maar toe Edwards die grootte van die swartmamba sien en die spesie erken, het hy hulp ingeroep. Ons het die slang omstreeks 19:50 die aand verwyder,” het Bothma gesê.

ALSO READ: Barberton snake catchers ensure safety of people and snakes

Bothma sê swartmambas kan dodelik wees en moontlike gevaar vir huiseienaars en inwoners inhou. Maar dit bly die slang waarvoor hy die grootste respek het, en diegene wat hom goed ken, sal sê die grootste liefde.

Bothma doen ongelooflik moeite met al die reptiele en diere wat hy in bewoonde gebiede vind. Nadat hy wetenskaplike data noteer en aantekeninge oor die slang se kondisie gemaak het, laat hy hulle vry.

Op Maandag 21 Maart het hy spesiaal vir Steelburger/Lydenburg Nuus die slang weer uit die slangkas gehaal om ’n beter foto te neem. “Sodra ek oortuig is die swartmamba is gesond, laat ek hom in ’n onbekende area vry. Ek laat hulle op ’n veilige plek waar ander slange voorkom, vry,” het Bothma gesê. Net ’n druppel van die swartmamba se gif kan tot dood lei. Die gif kan die senuweestelsel tot stilstand bring en slagoffers verlam. Bothma het gesê dit is dan baie belangrik om teengif so vinnig as moontlik toe te dien en dat dit ten alle tye beskikbaar moet wees.