Dapper stryd teen siekte eindig
Steve Erasmus het 'n ernstige terugslag gehad as gevolg van sy suikersiekte.
BURGERSFORT – Steve Erasmus wat twee been amputasies ondergaan het as gevolg van suikersiekte is twee weke gelede oorlede nadat hy sy dapper stryd teen die siekte verloor het.
Erasmus se kreatiewe kant het ontwaak nadat hy sy laaste been amputasie in 2012 ondergaan het . Weens sy gebrek om te loop, kon Erasmus nie terugkeer na sy vorige letterskilderwerk-onderneming in Rustenburg nie en hy en sy vrou, Ansie het hul in Burgersfort kom vestig. Sy mediese terugslae het hom die geleentheid gegee om ‘n stokperdjie te ontwikkel wat by sy omstandighede gepas het. Erasmus kon verskeie voorwerpe teken en skilder. Steelburger/Lydenburg Nuus het verlede maand ‘n storie gepubliseer oor Erasmus se skilder- en tekentalent. Sy suikersiekte was nog in daardie stadium stabiel.
Aan die einde van November het die Erasmusse besluit om die Desembervakansie by hul seun in Rustenburg deur te bring. Nadat hulle in Rustenburg gearriveer het, het Erasmus ‘n ernstige terugslag gehad met ‘n suikertelling van 2.5 wat daartoe gelei het dat hy in ‘n ligte koma verval het. Erasmus het nooit weer uit die koma ontwaak nie en is op 28 November oorlede. Sy begrafnis het verlede Vrydag in Rustenburg plaasgevind.
