kykNET hoe rock die Innibos-verhoë nou
Innibos is vir almal, maak nie saak of jy jou biscuit wil skud of eerder hard wil rock nie.
Op Woensdag, 5 Julie spook die finaliste in die RockRumoer-kompetisie sake uit op die kykNET Nou!-rockverhoog.
Dié kompetisie word jaarliks landwyd aangebied en die wenner kry R25 000 geborg deur Cell C, plus ‘n musiekvideo deur kykNET.
Die beste sanger, kitaar-, trom- en baskitaarspeler kry elkeen R1 000. Vanjaar se finaliste is After Robot, ‘n Johannesburgse band wat hulle styl as groove rock beskryf; Generasie Stasie van Pretoria met alternatiewe rock; die folk rocker, Matt Carstens van Kaapstad, en die twee Bloemfonteinse bands Kirkland en Having Cows met onderskeidelik alternatiewe en indie rock.
Die span beoordelaars is Francois van Coke, Albert Frost en Neels van Jaarsveld.
Die Standard Bank-hoofverhoog behoort Donderdagaand, 6 Julie aan die rockers wanneer die twee beste finaliste van die RockRumoer-kompetisie saam met Arno Carstens, Hemelbesem, Matthew Mole, Majozi, The Black Cat Bones en Vanfokkingtasties optree.
Ewe indrukwekkend is die line-ups vir Vrydag, 7 Julie en Saterdag, 8 Julie op die kykNET Nou!-verhoog.
Vrydagaand is dit Manny Walters, Albert Frost, Spoegwolf, Bittereinder en Die Heuwels Fantasties se beurt, en Saterdagaand eindig op ‘n hoë noot met Tuin, verlede jaar se RockRumoer-wenner, Desmond & The Tutus, Dan Patlansky, Wonderboom en Locnville.
Oudergewoonte is die kykNet Nou!-rockverhoog op die netbalbane agter die hoofpaviljoen op die Innibos-feesterrein. Sorg dat jy daar is – elke aand!
• Die volledige program is op innibos.co.za beskikbaar en kaartjies is by Computicket te kry.
