Kersloffees bereik nuwe hoogtes met gedigte en sang

MBOMBELA –  Sondag se Kersloffees by i’langa Mall was die 13de aflewering van dié geliefde tradisie op die dorp se Kerskalender.

Soos elke jaar was daar Kerssang uit die boonste rakke, maar vanjaar is die liedere regdeur die program met gedigte afgewissel.

So is vertellings van die Kersverhaal afgewissel met “Stille Nag” soos gesing deur die gewilde Binnelanders-akteur, Germandt Geldenhuys.

Hy het ook ‘n hele paar gedigte voorgedra. So is “Somer Kersfees Wens” gevolg deur Anne-Mari White wat “Somer Kersfees” gesing het. Dié partoon is deur die konsert gevolg en het groot byval by die gehoor gevind.

Ander plaaslike kunstenaars wat opgetree het, was Jason Lee en Eugene Jacobs asook Anton van Zyl met sy musiekgroep.

Organiseerder Koos Schoonraad sê die gehoor het Geldenhuys veral baie geniet. “Hy het ‘n fantastiese stem. Mense was heeltemal verbaas oor hoe goed hy sing.”

Ander bekende name wat by die fees opgetree het was sangers Rudi Muller, Willie Joubert en Leon Ferreira sowel as die groep Onbeskaamd. Die aand is afgesluit met ‘n vertoning deur Manne Wat Glo.

Dieselfde oggend is ‘n spesiale tee vir bejaardes gehou – ook by die inkopiesentrum. Die plaaslike sangers sowel as Geldenhuys het die oggend die vermaak verskaf.

Volgens Schoonraad was die aand se opkoms sowat 600 mense – min of meer dieselfde as verlede jaar. Dit is egter moeilik om presies te bepaal, aangesien die konsert gratis is – ‘n donasie vir welsyn word slegs gevra.

“Dit is interessant dat die kollekte meer was as verlede jaar,” sê hy. Daarmee kon hulle bykans R5 000 aan beide Radio Laeveld se Met Hart-inisiatief en Huis Betlehem skenk.

“Ons is baie bly dit is so goed ondersteun. Die terugvoer van die gehoor was ook baie positief. Een man het die aand vir my gesê hy was by al 13 Kersloffees-konserte en hierdie een was by verre die beste nog. Hy het gesê ons sal nooit beter as dit kan doen nie.”

Watwou, maak maar reg om volgende jaar weer meegevoer te word met gewyde vermaak sonder eweknie.

Sien meer van vorige konserte hier: Kersloffees vier geloof, hoop en liefde  en Laudate Choir to take on the world at World Choral Games