Ringbalspan speel kelner om fondse in te vorder
Die klub is in 2017 gestig nadat Numbi Ringbalklub van Hazyview na Nelspruit verskuif het.
Die Nelspruit Ringbalklub het onlangs hulle lywe by RocoMamas in i’langa Mall kelner gehou. Die inisiatief was ter ondersteuning van die span wat sedert verlede jaar die gebied in dié sport verteenwoordig.
Die klub is in 2017 gestig nadat Numbi Ringbalklub van Hazyview na Nelspruit verskuif het. Dit het daartoe gelei dat ‘n aantal spelers en bestuurslede onttrek het.
Die span het egter weer vinning op dreef gekom en in 2018 onder nuwe bestuur, die klub weer herbou. Hulle ledetal het sedertdien so aangegroei dat die klub vanjaar deur ‘n manen damespan in die liga verteenwoordig word.
Die Valencia Sportkompleks is hul nuwe tuiste en ondersteuners van dié sport kan hulle Dinsdae en Donderdae om 18:00 tot 20:00 daar sien oefen. Die span ding in die Mpumalanga Laeveld-distriksliga mee en volgens klublid, Christine Horn, het hulle tot dusver gemengde welslae behaal.
LEES OOK: A day in the life of a local writer
Sy sê, “Albei spanne het wedstryde gewen en verloor, maar die spanne is baie kompeterend en dit is nog glad nie ‘n uitgemaakte saak wie die ligawenners gaan wees nie.
“Daar word weekliks hard geoefen om die kwaliteit van die spel te verbeter.”
Om fondse in te samel om hul baangelde te betaal, het die span RocoMamas se personeel ondersteun deur as skadukelners op te tree. Vir die span was dit ‘n blaaskans van die spel wat fisiek veeleisend kan wees, en ook ‘n geleentheid om te ontspan en met die personeel en klante te meng.
LEES OOK: Food supplies low at local SPCA
Die aand is moontlik gemaak deur die eetplek se bestuurder Bruce Badenhorst, wat self ook ‘n ywerige ringbalspeler is. ‘n Persentasie van die aand se inkomste is aan die klub geskenk.
Volgens Horn was die geleentheid ‘n reusesukses wat die klub sal versterk asook nuwe belangstelling in die sport sal bevorder.
Die span meet komende naweek om 15:00 kragte met spanne van Malelane en Barberton by die Valencia Sportkompleks.
Hulle nooi Nelspruiters uit om die dag met hulle te geniet. Die toegangsfooi is R10 per motor.
