Steve roer die hartsnare in Mbombela
Die gehoor het uit die staanspoor by countrygunstelinge aanklank gevind, en al was daar nie 'n dansvloer nie, het dit niemand gekeer nie.
MBOMBELA – Net soos Steve Hofmeyr se liefde vir countrymusiek ongetwyfeld is, so ook is sy aanhangers se liefde vir hom.
‘n Klinklare bewys hiervan is dat nagenoeg 800 mense Saterdagaand hulle kampstoele, of bale soos dit enige boere-opskop betaam, nader getrek het vir die vyfde jaarlikse countrykonsert, aangebied deur Skankane Transport en Radio Laeveld.
Dit was ‘n opskop soos min.
Lees ook: Leilani stap 27 km in Mbombela.
Jodelprinses Karlien Husselman het haar goed van haar taak gekwyt om verrrigtinge af te skop, en reeds hier het die voete begin jeuk. Haar diepte as mens, in hart en siel, kom deur haar stem na vore en sy raak jou hartsnare.
Husselman is bekend vir treffers soos “Heidi”, “Ahoema Shewelana”, en uit haar eie pen, “Hier’s my hart”, “Somersonpartytjie” en “Kom ons dans”, om maar net ‘n paar te noem.
Sy het tydens haar optrede genoem dat haar droom van kleins af was om iemand soos Hofmeyr se konserte te open. Na afloop van die konsert het hy op sosiale media genoem dat hy beslis haar musiek in sy motor gaan luister.
Toe Hofmeyr die verhoog betree, kon die gehoor uit die staanspoor by countrygunstelinge aanklank vind, en al was daar nie ‘n dansvloer nie, het dit niemand gekeer nie. Hy het weer bewys dat hy in dié genre die hartsnare na soveel jare nog bly roer.
Treffers uit sy nuwe album, The Country Collection, wat binne enkele dae platinumstatus bereik het, het aanhangers op hulle voete gehad, terwyl Hofmeyr dié sentimentele genre treffend vertolk.
Hy het sy vertoning afgeskop met “The Ballad of the Green Beret”, gevolg deur gunstelinge uit sy nuwe album, onder meer “Lucille”, “Another Somebody Done Somebody Wrong Song”, “Woman (Beautiful Woman)”, en “Amanda”.
Hofmeyr het tussendeur hulde aan Afrikaanse legendes, soos Karen Zoid, Bok van Blerk, Pieter Koen en Wikus van der Merwe, gebring.
Die Stem het ook oudergewoonte deur die skuur weergalm, terwyl die gehoor dit uit volle bors saamgesing het. Hofmeyr het hom oudergewoonte op sosiale media uitgelaat oor sy verbanning by Innibos weens dié lied. Hy het egter bygevoeg dat dié fees by Skankane hom weer tuis in Mbombela laat voel het.
Die organiseerder, Vanessa Roets, het gesê sy is baie tevrede met die opkoms, en sien uit daarna om nog vir baie jare saam met Hofmeyr ‘n pad te stap. “Mense is lief vir hom. Hy is ‘n ware gentleman,” het sy gesê.
