‘n Valskermongeluk het Sondagoggend die lewe van ‘n 44-jarige man van Mbombela naby Delmas geëis.

Hilmar Backer is opslag dood, en sy vriend Rudi Serfontein van Centurion, wat saam met hom die dag gespring het, is beseer toe hulle na bewering in die lug gebots en neergestort het.

Marie Brey, die waarnemende kommunikasiehoof van die Burgerlugvaartowerheid, het die voorval bevestig en gesê dat die presiese oorsaak daarvan nog nie bekend is nie.

ALSO READ: Bobbejaanbyt skeur man se skouer oop in Marlothpark

“‘n Ondersoek in samewerking met die Valskermvereniging van Suid-Afrika en lugreddingsdienste is van stapel gestuur om die presiese oorsaak daarvan vas te stel,” het sy gesê.

Kol. Donald Mdhluli, die provinsiale polisiewoordvoerder, het gesê dat ‘n geregtelike doodsondersoek deur die Delmas Polisiestasie gedoen sal word.

Boodskappe met hulde het op sosiale media vir Backer ingestroom.

“Hilmar het voluit geleef, maar ook voluit gegaan. Sy vreeslose avontuurlustige passie was ook sy weg om die tydelike met die ewige te verwissel. Dankie vir jou mentorskap aan jong mense. Jou lewe dien as rolmodel vir ander. Rus sag,” het een van die inskrywings gelui.

Laevelder sal meer inligting aan sy lesers verskaf sodra dit beskikbaar word.