Swierige matriekafskeid vir Komatipoort Akademie
Komatipoort Akademie se matriekleerders van 2021 het met hul metgeselle op Donderdag 30 September die asems weggeslaan tydens die opkoms vir hulle matriekafskeid.
Die bywoners het die netjiese drag en interessante motors waarmee die leerders opgedaag het, terdeë geniet.
Dié swierige geleentheid is by die skool afgeskop met die gr. 12’s wat op verskeie unieke maniere op die rooitapyt verskyn het en in hul pragtige uitrustings gepronk het.
Nes verlede jaar was die opkoms ook weer lewendig uitgesaai en het dit die geleentheid geskep vir ‘n bykomende 1 600 mense om ook te deel in dié hoogtepunt.
LEES OOK: IN FOTO’S: Hoërskool Nelspruit hou matriekafskeid
Hierdie jaar is daar weggebreek van die tradisionele geleentheid en na afloop van die opkoms is die leerders eers per bus en toe met oop wildsbesigtigingsvoertuie weggevoer na ‘n eksklusiewe onthaalplek binne die Krugerwildtuin.
Die span van Royal Safaris het uit hulle pad gegaan om te verseker dat dit ‘n besonderse geleentheid was; van dekor tot kos was alles uit die boonste rakke en selfs ‘n ligte reënbui kon die feestelike gemoed nie blus nie.
Dit was baie van die matrieks se eerste keer in die Kruger in oop voertuie, en die ontmoeting met ‘n leeu was veral besonders.
LEES OOK: NHS se graadtwaalfs glansryk by matriekafskeid
As gashere van die matriekafskeid het die gr. 11-leerders, hulle voogonderwysers en hulle ouers hulle goed van hul taak gekwyt en is daar hierdie jaar vir seker ‘n uitdaging gevel vir toekomstige geleenthede om hierdie een te oortref.
Komatipoort Akademie wil graag almal wat bygedra het, finansieel en ondersteunend, bedank vir hulle aandeel en in besonder vir die span van Royal Safaris.
