Op Vrydag, 28 Februarie, was daar groot opwinding by Laerskool Nelspruit toe die leerders hul jaarlikse Kaskardag gevier het.

Die gewilde tradisie het weer eens gesorg vir hope pret, kreatiewe uitrustings en ‘n gees van spanwerk. Elke graad het hulle beste gegee, en die gejuig en lag kon oor die hele skoolterrein gehoor word.

Hierdie kaskardag was ekstra spesiaal, aangesien dit die laaste een vir mnr. Adé Adendorff as adjunkhoof – akademie was. Almal het seker gemaak dat dit ‘n dag is wat hy nie gou sal vergeet nie. Van die begin af was die energie aansteeklik.

Die spanne het hulle kaskarre met krag aangejaag en die leerders het hulle maatjies ondersteun.

‘n Groot hoogtepunt van die dag was die beste uitrustingtoekenning, wat hierdie jaar aan die gr. 2’s oorhandig is. Hulle was uniek en vol karakter, en hulle het gewys dat styl en skoolgees hand aan hand gaan, maar hulle was nie die enigstes wat uitgestaan het nie.

Elke graad het ongelooflike moeite gedoen met hul kostuums en tema, wat die dag nog meer kleurvol en spesiaal gemaak het.

Die gr. 7’s het beslis ook indruk gemaak, aangesien dit hulle laaste kaskardag in die laerskool was. Hulle het hul volle energie ingesit om die dag werklik te geniet, en hul opgewondenheid en gees was aansteeklik. Met hul laaste resies agter die rug, het hulle vir seker baie spesiale herinneringe geskep wat hulle vir altyd sal koester.

Dit was ‘n dag vol spoed, opwinding en trots, ‘n herinnering aan hoekom die kaskardag so ‘n belangrike deel van Laerskool Nelspruit se tradisies is. Vir mnr. Adendorff was dit ‘n hartroerende afskeid van ‘n geliefde geleentheid, en vir die leerders was dit nóg ‘n wonderlike dag van lag, spanwerk en skoolgees.

Die sukses van hierdie jaar se kaskardag laat almal alreeds uitsien na volgende jaar se opwindende resies.