Die NG Gemeente Hazyview het Saterdag hulle Familiefees aangebied om 50 jaar as ’n geestelike toevlugsoord vir baie in die omgewing te vier.

Volgens die komitee was die fees ook ’n geleentheid om fondse in te samel om die kerk se 43 jaar oue gebou in stand te hou.

Ten spyte daarvan dat dit die eerste keer was dat die gemeente so ’n groot geleentheid aangebied het, was dit ’n reusesukses en het dit talle gesinne bymekaar gebring. Van die fondse word ook vir die versorging van minderbevoorregtes in die gemeenskap gebruik.

Die fees kan, volgens die komitee, moontlik ’n jaarlikse instelling word aangesien die ‘toetslopie’ so goed verloop het. Die inwoners het die kerk aangemoedig om meer sulke feeste te hou, aangesien die dorp nie baie sulke geleenthede aanbied nie.

Lees meer hier: NET Afrikaans vat hande met mediastaatmaker Laevelder

Bekende kunstenaars het die skare vermaak en verskeie stalletjies het heerlike en interessante items verkoop. Die komitee het seker gemaak dat daar iets vir almal was. ’n Speelterrein en verskeie ander aktiwiteite het gesorg dat die kinders die feestelikhede ook kon geniet.

Die komitee het saamgestem dat, ten spyte van klein haakplekkies wat vinnig uitgesorteer is en waarvan die feesgangers dalk nie eens bewus was nie, die fees ’n groot sukses was. Sommige besoekers het na die tyd ’n vraelys voltooi en 100% het gesê dat hulle weer so ’n fees sal bywoon.