Verskrikte twee weke oue aapwesie kry ’n tweede kans
Die hulp van ’n weldoener het heel moontlik die lewe van die apie gered.
Was dit nie vir die oplettendheid van ’n barmhartige samaritaan nie, sou ’n baba-apie waarskynlik gesterf het.
’n Motoris het Saterdag op die R38 tussen Badplaas (eManzana) en Barberton die karkas van ’n blouaap langs die pad opgemerk.
LEES OOK; FOTO’S EN VIDEO’S: Peuseltyd vir ratse nagapie in Marlothpark
Toe hy nader gaan kyk, het hy ’n piepklein aapmannetjie gesien wat verward en verskrik aan sy ma se liggaam vasklou.
Volgens Lize Pienaar van die DBV is die kleintjie na raming sowat twee weke oud. “Ons vermoed die ma is deur ’n motor getref en het langs die pad gevrek,” sê sy.
“Gelukkig het die motoris die regte besluit geneem en die diertjie na ons toe gebring. Baie mense probeer sulke kleintjies self grootmaak, wat dikwels rampspoedig eindig.”
Die Riverside Wildlife Rehabilitation Centre (RWRC) naby Hoedspruit is onmiddellik gekontak en het enkele ure later opgedaag om die baba-apie te versorg.
RWRC spesialiseer in die rehabilitasie van primate soos ape, bobbejane en nagapies, met die doel om hulle uiteindelik weer in die natuur vry te laat.
