Die dood van ‘n driejarige Engelse bulhond, Mathilda, wat na bewering deur ‘n silwer BMW X3 doodgery is, het groot reaksie op sosiale media ontlok. Divergent Ops, die privaat sekuriteitsmaatskappy wat die voorval ondersoek, doen intussen ‘n beroep op die gemeenskap om op die uitkyk te wees vir die voertuig.

Marilise Rossouw, die vrou van die oud-Springbok Danie Rossouw, was Mathilda se hondema en is diep geraak deur haar verlies. Mathilda, of Tillies soos Rossouw haar genoem het, was soos een van haar kinders.

LEES OOK: Mbombela-padvark ry hond voor jong kinders dood

Op 4 Oktober het Rossouw en haar kinders voor hul huis in Lost Trailstraat, ‘n doodloopstraat, hokkie gespeel toe die voertuig na bewering teen ‘n hoë spoed in die straat afgery het.

Rossouw het aanvanklik gedink die bestuurder het verdwaal en hom gevra of hy hulp nodig het. Volgens haar het hy egter vyandig gereageer en gesê dat hy nie hulp nodig het nie.

Sy het hom daarna gevra om versigtig te bestuur en bedag te wees op haar kinders en honde.

Volgens Rossouw, asook beeldmateriaal wat aan Laevelder verskaf is, het die voertuig etlike minute stilgestaan voordat dit weggetrek en oor Mathilda gery het. Sy beweer dat die bestuurder nie gestop het nie, maar eenvoudig verder gery het.
Rossouw het inderhaas met Mathilda na die Nelspruit-dierehospitaal gejaag in die hoop dat die veearts haar kon red. Met haar aankoms is Mathilda egter dood verklaar.

LEES OOK: Dog makes unexpected friends with baby jackals

Rossouw nader instansies om hulp

Rossouw, ‘n passievolle diereliefhebber en -aktivis, het aanvanklik probeer om ‘n saak by die DBV Nelspruit aanhangig te maak. Sy sê sy kon egter weens ‘n gebrek aan bewyse nie die nodige hulp kry nie. Sy het daarna ook probeer om die voorval by die SAPD aan te meld, maar was volgens haar onsuksesvol.

Rossouw beweer die DBV en die polisie het aan haar gesê die onus rus op haar om haar hond in haar erf te hou of met ‘n leiband te beheer. Die voorval het hewige reaksie op sosiale media ontlok. Gebruikers eis geregtigheid vir Mathilda en doen ‘n beroep op die DBV om die saak verder te ondersoek.

DBV spreek openbare kommer aan

Die organisasie het in ‘n openbare verklaring gereageer: “Eerstens betuig ons ons innige simpatie met die familie. Ons verstaan die ontsteltenis en woede rondom hierdie voorval, en ons keur geen vorm van dieremishandeling goed nie. Ons is steeds bereid om enige nuwe bewyse te oorweeg wat kan help om te bepaal watter verdere optrede gepas is.”

Rossouw het haar daarna tot Divergent Ops gewend vir hulp. Juandré Rautenbach, ‘n sekuriteitspesialis en uitvoerende hoof van die maatskappy, het bevestig dat die voertuig se nommerplate vervals is. Volgens hom was daar vier insittendes in die voertuig: drie mans en ‘n vrou.

Divergent Ops doen ‘n beroep op die gemeenskap om enige inligting oor die voertuig met die maatskappy te deel. Kontak Divergent Ops by 0861 911 677 of 082 311 8881.

Hoewel Rossouw steeds met ‘n seer hart oor Mathilda rou, hoop sy dat die hulp van privaat sekuriteit sal lei tot die opsporing van die voertuig en diegene wat by die voorval betrokke was.