Hoërskool Nelspruit se graadtwaalfs sluit hoërskoolloopbaan af
Die jaarlikse Vinculum-tradisie is altyd ’n gepaste manier vir die matrieks om hul hoërskoolloopbaan af te sluit.
2024 se matrieks het onlangs een van Hoërskool Nelspruit se tradisies voortgesit deur slotte aan die Vinculum-struktuur te sluit.
Hierdie simboliese gebruik het oor die jare heen ‘n waardevolle manier geword waarop hierdie matrieks hul verbintenis aan NHS en hul skoolloopbaan kan verewig.
Die jaar se duxleerders, Schalk Grobbelaar en Zoe Scheepers, het ook ‘n USB-stafie met herinneringe en foto’s van hul matriekjaar in die 2024-tydkapsule geplaas. Hierdie kapsule sal vir ‘n dekade verseël bly, waarna dit tydens hul 10-jaar reünie weer oopgemaak sal word.
Elke matrikulant het ‘n slot aan die 2024 Vinculum-ketting gesluit, wat die afsluiting van hul kinderjare en die simboliese verbintenis aan Hoërskool Nelspruit, hul geliefde alma mater, uitbeeld.
Met hierdie tradisie betuig die matrieks van 2024 hul liefde vir NHS en verseker hulle dat hul stories altyd deel van die skool se ryk geskiedenis sal bly.
