Tennisspelers speel die baan vuurwarm
Senior tennisspelers het vanaf verlede Donderdag tot Sondag die Laeveld se bane aan die brand gespeel.
Die Mpumalanga Senior Tennistoernooi is by Matumi en Van Riebeek Park se bane beslis en die Laevelders het mekaar behoorlik die stryd aangesê.
In die mans-enkelspel, ouderdom 60-65, het die Laeveld se Hansie Schoeman na die halfeind deurgedring deur Eugene Smith vanNoordwes met 6-1 en 6-0 te klop. Hy het egter vasgeval teen Ronnie van Tempelhof van Suidwestelike Distrikte en het met 6-1, 6-2 verloor.
Hy kon egter vir die derde en vierde plek uitspeel en het vierde geëindig toe Daniel Strydom hom met 6-3, 6-2 geklop het.
In die vroue-dubbelspel, ouderdom 55-60, het die Laeveld se Jana Oltman en Marie van der Merwe tot in die halfeind gevorder.
Hulle het mede-plaaslike spelers Elize Delport en Cheryl Schoeman in die kwarteind 6-0 en 6-3 geklop maar toe teen Lynn van Tempelhof en Sharon van der Schyff van Gauteng Sentraal met 6-4 en
7-5 verloor.
Johanna Brink en Petronelle Dickson het ook na die halfeind deurgedring deur Jabulile Dlamini en Beverley Solomons met 6-2 en 6-2 te wen maar het toe teen Louise Minnaar en Laetttia van der Walt van Mpumalanga met 6-0 en 6-1 verloor.
Die twee Laeveldse spanne moes dit toe teen mekaar uitspook om die derde plek, en Oltman en Van der Merwe het met 6-0 en 6-2 geseëvier.
In die mans-dubbelspel, ouderdom 45-50, het Christo Esterhuizen en Bruce Whittaker algeheel in die tweede plek geëindig.
