Twee leerlinge van Hoërskool Ben Viljoen deel die toekenning as fotograaf van die jaar.

Dié leerlinge is Ellené van der Westhuyzen en Marli Muller.

Ellené vertel dat haar passie vir fotografie ontstaan het as gevolg van Jean-Marie Heyns, Hoërskool Ben Viljoen se bemarker en fotograaf.

“Ek het verlede jaar eers ernstig begin foto’s neem, nadat Jean-Marie my geïnspireer het met haar pragtige foto’s. Sy is ook my mentor en gee my altyd briljante raak. Sy is uitstekend is fotografie en kan eintlik vir enigiemand ’n inspirasie wees.”

Sy geniet dit om sport en natuur af te neem. “Die lekkerste deel van fotografie is dat dit tyd vir ’n oomblik laat stilstaan. Jy kan emosie en oomblikke vasvang en dit altyd hou as herinneringe.”

Ellené beoog om volgende jaar weer vir die skool foto’s te neem en elke oomblik met haar kamera vas te vang.

“Hoërskool Ben Viljoen is ’n aanwins vir iemand wat fotografie wil opneem as stokperdjie, om ondervinding op te bou of as ’n trappie as professionele fotograaf, want daar is altyd ’n groot verskeidenheid byeenkomste waar jy die geleentheid kan kry om foto’s te neem en jou vaardighede kan oefen.”

Vir Ellené is die toekenning ’n groot eer. “Dit wys dat my werk raakgesien en waardeer word.”

Ellené is nog onseker wat sy wil studeer, maar sê dat haar grootste droom is “om die ewigheid eendag te behaal.”
Haar leuse is: “Romeine 12:12: Verbly julle in die hoop; wees geduldig in die verdrukking; Volhard in die gebed”