Marble Hall: Liggiehuis hou oop aande!
Die bekende Liggiehuis in Marble Hall hou vanjaar, soos oudergewoonte, twee oop aande vir die publiek om die liggies van nader te aanskou.
Almal in Marble Hall ervaar sommer vinnig Kersvreugde wannneer die Van der Westhuizens hul huis in Proteastraat, soos die afgelope 10 jaar, tooi in die mooiste kersliggies en feesseisoen dekor.
Om hierdie Kersvreugde aan nóg meer mense te bring, het hulle besluit om twee oop aande aan te bied, wat reeds in 2023 begin het.
Eers het hul besluit om ’n fotohoekie in hul tuin te installer met fotoraam, kersboom, kersvader en die pragtige liggies in die agtergrond.
Daarna het hul besluit om die twee oop aande aan te bied, waar inwoners die geleentheid gegun word om van naby die liggies te bekyk.
Die oop aande dien as ’n fondsinsamelingsprojek vir die 4-Poot Fonds.
Hul sal vanjaar weer die twee oop aande aanbied op 23 en 24 Desember vanaf 19:00 tot 21:00.
Persone kan by die fotohoekie ’n foto neem teen R20 per foto, of self een neem.
Daar sal ook worsbroodjies te koop aangebied word teen R30 en koeldrank teen R10.
Persone wat donasies wil maak gedurende die oop aande, kan kontant of honde- en katkos skenk. Alle fondse en kos word aan die 4-Poot Fonds geskenk.
Gesinne word hartlik uitgenooi om die huis te besoek en kinders kan vir kersvader briefies skryf, wat hulle in die posbus voor die huis kan gooi.
Hierdie jaar is daar ook twee nuwe uistallings aangebring vir unieke kersfoto’s.
Geniet die Liggiehuis van naby en voel die Kersvreugde hierdie feesseisoen.
